Pakistan PM kaihhruai sorkarin term hmang zo loa ban tum

Pakistan prime minister Shehbaz Sharif chuan a kaihhruai sorkar chu a term hman zawh hmain a bang dawn tih Pathianni khan a sawi.

Sialkot-a Government College Women’s University programme a hmanpuinaah, Prime Minister chuan, "Sorkar term hi thla tharah a zo dawn a,mahse, kan term zawh hmain kan bang dawn. Sorkar lailawk a ding phawt dawn a ni," a ti. PM hian a hma lawkin sorkar chuan a term a hmang zo dawn tih a lo sawi tawh a, mahse, Inrinni khan ṭangual sorkar hnuaia a thawhpui, Pakistan People's Party (PPP) hruaitu Asif Ali Zardari-a'n thurawn a pek hnuah, term hmang zo loa ban hi a tum leh ta zawk a ni.

PM hian August 14-ah a kaihhruai ṭangrual sorkar term chu a zo dawn a, Election Commission of Pakistan (ECP) chuan October emaw, November thla emaw hian an ram inthlanpui neih hun tur a puang dawn niin a lo sawi tawh bawk.

Pakistan-ah hian an ram parliament, National Assembly term a tawp aṭanga ni 60 chhungin inthlanpui hi buatsaih tur tih a ni. Mahse parliament lower house hi a term zawh hmaa ṭhiah a nih chuan, inthlan hun tur hi ṭhiah a nih aṭanga ni 90 chhung atan a sawn hlat theih thung.