Lal thutlukna siam a sawisel avangin Malaysia eptu hruaitu thubuai siamsak

Malaysia eptu pawl, conservative Islamic party, PAS hruaitu Muhammad Sanusi Md Nor chu an ram lal thutlukna siam dan a sawisel avangin, sorkar laka hela puhin thubuai pahnih siamsak a ni.

Kedah state chief minister ni bawk, Sanusi hi nimin khan court-ah hruai a ni. Court-ah a inlan hnua chanchinthar lakhawmtute a kawmnaah, sorkar chu mi tinin an duh zawng sawina tur an neihte rahbehsakah a puh. "Malaysia-ah chuan kan duh dante engmah kan sawi ve thei lo a ni," a ti.

Sadusi hian tun thla tir lamah khan federal leh state level-a sorkar siam dan tura Malaysia lal thutlukna siam chu a sawisel a ni. A thubuaiah hian thiam loh chantir a nih chuan, kum thum thleng lungin tantir bakah, an ram pawisa Ringgit 5,000 chawitir theih a ni ang.

Muslim tamna, Malaysia-ah hian an lal hi an dah pawimawhin, Islam sakhaw vawng nungtu berah dahin, an ram mipuite pawhin an dah chungnung hle. Lal leh lal chhungkua sawiseltute hi colonial-era Sedition Act hnuaiah thubuai siamsak theih an ni. He dan hmang hian thubuai siamsak lo awm fo tawh mah se, politician zingah erawh a thleng khat hle.