Taliban-te'n hmeichhiate khuahkhirhna siam belh zel : UN

United Nations chuan Afghanistan-a rorel lai, Taliban chuan an rama hmeichhiate khuahkhirhna a siam belh zel niin Thawhṭannia Afghanistan human rights dinhmun chungchanga report a tihchhuahah a tarlang.

Khuahkhirhna a siam belhah, Taliban sorkar hnuaia ministry of public health chuan special medical studies lam zir chhunzawm turin mipate chu exam an phalsak a ni. February thla khan hmeichhe zirlaite chu medical graduation exam a khapsak a, nikum December thla khan unversity an kal an khapsak tawh bawk.

May thla tir lam khan international non-governmental organisation-a thawk, Afghan hmeichhe pahnih chu an laina hnai mipate tel loa an zin chhuah avangin airport-ah man an ni. Hemi thla vek hian NGO-a thawk hmeichhe pakhat chu Taliban intelligence service-in hrengin, darkar nga zet thu an zawt fiah a, a hna a thawh zawm zel chuan thahah an vau a, hei vang hian a bang zui ta a ni.

Taliban-te'n kum 2021, August thlaa Afghanistan-a sorkar thuneihna an hnehchhuh hnu khan, kum 1990 chhoa thuneihna an chan laia hmeichhiate khuahkhirhna khauh tak an siam ang kha an kalpui tawh dawn lo tiin an tiam a, mahse, a hnuah hmeichhia khuahkhirhna khauh tak tak hi an siam chho zui ta zel a ni.