Thailand Court-in PM candidate Pita Limjaroenrat a hrem

Thailand Constitutional Court chuan Move Forward Party hruaitu leh Prime Minister candidate, Pita Limjaroenrat chu Parliament member a nihna aṭangin a chawlhtir lailawk

Pita hi election law a bawhchhiat leh bawhchhiat loh chungchangah court chuan a chhui chiang mek a ni.

May thlaa an ram inthlanpui neihah hian Move Forward Party hian party dang pasarih an thawhpui a, Parliament lower house-ah hnehna an chang a ni. Prime Minister thar tur hi Parliament in hnih, lower house House of Representative leh upper house, Senate-in an thlang a ni.

Kum 42 mi Pita hian PM ni tur hian Parliament in hnih, member 749 awmnaah vote 375 hmuh a ngai a, kar liam ta khan vote hi lak ni tawh mah se vote 324 chauh hmuin, tling tura ngai zat hi vote 51 in a pha lo. Senate-ah hian sipai sorkar ruat an tam zawk a, hei vang hian vote laknaah pawh senator 249 aṭangin Pita hian thlawptu 13 chauh a nei a ni. Hei vang hian nimin khan a ṭum hnihna atan Parliament-ah vote lak leh tura tih a ni a, mahse, court-in a suspend tak avangin vote hi lak theih a ni ta rih lo.

Move Forward Party chuan Pita hi hrem ni mah se, PM nomination a nihna erawh a nghawng dawn lo tih an sawi a, mahse, party dang politician-te chuan PM ni thei lo tura dan an tum thung.

Pita hian media company-ah share a nei a, an ram danah media company neitu leh share nei chu Parliament member an ni thei lo ang tih a ni. Hei vang hian Parliament member aṭanga disqualify tur tiin a laka thubuai theh luh a ni. Pita chuan a share neih chu a pa hnen aṭanga a rochun a nih avangin, hei hian election rules a kalh lo tih a sawi ve thung.

Thailand Constitutional Court hian kum 2019 kha Future Forward party chu electoral rules bawhchhiaa puhin a lo ṭhiahsak tawh bawk.