Bangladesh PM ban phutin eptute'n kawng an zawh

Bangladesh prime minister Sheik Hasina chu nakkum January-a an ram inthlanpui neih hmaa bang tura phutin, Thawhlehni khan eptute'n khawpui hrang hrangah kawng an zawh.

Khawpui hrang hranga kawng zawh hi an ṭhahnem hle a, an ram khawpui Dhaka-ah chuan km. 13 dawna thui kawng an zawh a ni.

Hemi ni vek hian rorel lai party chuan Dhaka-ah kawng an zawh ve bawk a, Dhaka-a eptute leh rorel lai party-te innawr buainaah mi pakhat a thi. Khawpui danga kawngzawhnaa buaina chhuakah mi 50 vel an hliam bawk.

PM Hasina kaihhruai, Awami League hian Bangladesh-ah kum 2009 aṭang khan thuneihna an chang tawh a, sorkar hi eiru nasa leh mihring dikna chanvo palzutah puh a ni fo a ni. Security force-te chu eptute hruaitute man leh, sorkar hriatpuinaa sorkar dodaltu tam tak tihlumah an puh. Kum 2021 khan US chuan Rapid Action Battalion (RAB) security force leh senior officer pasarihte chu mihring dikna chanvo palzutah puhin a lo hrek tawh a ni.

Thawhlehnia kawngzawh hi eptu pawl, PM hlui Khaleda Zia kaihhruai Bangladesh Nationalist Party (BNP) huaihawt neih niin, party dang eng emaw zatin a zawm. Inthlan neih hma ngeiin Hasina chu bang tur leh, neutral care-taker sorkar hnuaiah inthlan hi buatsaih an phut.

BNP secretary general, Mirza Fakhrul Islam Alamgir chuan, Hasina kaihhruai sorkar chu bang a, Parliament ṭhiatin thuneihna chu interim adminstration kuta dah tura an phut thu a sawi a, hei hi an rama democracy tundin leh theihna tur a ni, a ti. Kawngzawhnaa tel tam tak chu political party mi leh sa ni lo, sorkar lai duh lo vanga telte an nih thu an sawi bawk.