Iraq-ah nawrh huaihawten Sweden embassy an luhchilh

Sweden khawpui, Stockholm-a mi pakhatin Mulsim lehkhabu thianghlim, Koran leh Judate lehkhabu thianghlim, Torah-te Israel embassy kawta hal a tum avanga lungawi lohna kal zelah, nimin khan Iraq khawpui, Baghdah-a Sweden embassy chu mipui thinrimin an luhchilh.

Stockholm-a police-te venna hnuaia Koran leh Torah haltumtu hian sawiselna a tawh nasat avangin a thil thum hi a ṭhulh leh nia sawi a ni.

Sweden ramah hian mipuiin lungawi lohna lantira nawrh huaihawt hi danin a phal leh khawng taka a vawn a ni. Sakhaw dang sawi chhiat khapna dan pawh kum 1970 khan paih a lo ni tawh bawk.

Baghdad-a nawrh huaihawta pungkhawmte hian Sweden embassy hi luhchilhin, compound chhungah meite an chhem a, building chungah an ram flag leh Iraqi Shia cleric, Muqtada al-Sadr chhinchhiahna lem an vai lang a, embassy pawn lamah ṭhenkhatin ṭawngṭaina hunte an lo hmang bawk. Embassy an luhchilh lai hian staff an awm leh awm loh erawh sawichian a ni lo.

Embassy beih a nih thu hi thuneitute chuan an hre lawk lo niin an sawi. Iraq foreign ministry chuan thil thleng chu a dem thu a sawi a, "Iraq sorkar chuan he thil thleng chungchang hi hmanhmawh taka chhui nghal turin thuneitute a hriattir tawh. He thila inhnamhnawihte chu hriatchhuah a, dan ang taka an chungthu ngaihtuah a nih theihna turin a ṭul angin hma la nghal turin hriattir an ni," tiin a thuchhuah siamah a tarlang.

Muslim-te chuan an lehkhabu, Koran hal chu an sakhaw tihbawrhbanna nasa takah ngaiin, tun hmaa Koran hal anih ṭum pawhin nasa takin an lo nuar tawh ṭhin. Tun ṭuma thil thleng vang hian Afghanistan-ah chuan Taliban-ten Swedish organization kaihhnawih thil tih reng reng a khap nghal a ni.

June thla khan Iraq aṭanga Sweden rama Kristian pakhat pem lut chuan Muslim-te hun serh, id al-Adha hman laiin Stockholm-a mosque bulah Koran a hal a, Islam ram hrang hrangten an sawisel nasa hle. He thil thleng vang hian Baghdad-a Sweden embassy chu mi ṭhenkhatin an lo luhchilh tawh a, kawtthlerahte lungawi lohna an lantir bawk.