Afghan hmeichhiaten nawrh huaihawt

Afghanistan-a rorellai, Taliban sorkarin hmeichhiaten beauty parlour an siam khap a, khar vek tura thupek a tichhuah avangin Nilaini khan an ram khawpui, Kabul-ah hmeichhe ṭhenkhatin lungawi lohna an lantir.

Security official-te chuan hmeichhe pungkhawmte hnawhdarhna atan van lam hawiin silaite an kap a, firehose-te an hmang bawk.

Taliban thuneitute chuan thla hmasa khan hmeichhiate enkawl, an ram chhung hmun hrang hranga beauty salon-te chu khar turin thupek a tichhuak a, mi tam tak eizawnna an tihtawpsak a ni.

Afghanisan-a Taliban-ten thuneihna an chan hnuah, sorkar laka lungawi lohna lantir leh nawrh huaihawt hi a thleng khat hle. Pungkhawm an awm pawhin sipaiten tharum hmangin an hnawhdarh thuai ṭhin. Mahse Nilainia hmeichhiaten Butcher Street-a lungawi lohna an lantirnaah hian mi 50 vel an pungkhawm a, pungkhawmte hnawhdarhna atana silai hmehpuah leh, firehose an hman lai video leh thlalakte hi a hnuah an thehdarh a ni.

United Nations Assistance Mission in Afghanistan (UNAMA) chuan nawrh huaihawtte hnawhdarh an nih dan chu a dem thu a sawi a, hmeichhe pungkhawmte chu tharum hmangin nek beh an ni, a ti.