BRIC summit-ah Russia President Putin a tel dawn lo

Russia president Vladimir Putin chu August thlaa South Africa-a BRICS summit-a tel tura sawm a nih hnuah a tel dawn lo tih South Africa chuan a sawi a, mahse virtual hmangin a chhim thung ang.

South Africa President Cyril Ramaphosa chuan hemi chungchangah thuchhuah siamin, "President Vladimir Putin chu summit-ah a tel dawn lo a, Russia ram aiawhin foreign minister Sergei Lavrov a tel thung dawn a ni," a ti. BRICS hruaitute zingah Putin chauh hi a hmuna summit hmang lo tur leh, virtual hmanga chhim tur awmchhun a ni.

International Criminal Court chuan President Putin hi Ukraine nena an indo meknaah, Ukraine naupangte an ram aṭanga thawnchhuakah puhin, March thla khan manna tur thupek a tichhuak a ni. Putin hi Russia ram leilung a chhuahsan chuan man theih reng a ni dawn a ni. Mahse South Africa lam nena inbakna an neih hnuaiah, summit-a inlan lo tur hian inremna an siam ta nia sawi a ni. ICC in warrant a tihchhuah hmain, South Africa hian summit-a tel tur hian Russia hi a lo sawm tawh a ni.

South Africa hi ICC dinna, Rome Statute-ah a tel a, court thutlukna siam hi a zawm ve zel a ngai bawk. Mahse kum 2015 khan ICC-in man tura a tih, hetih laia Sudan ram president Omar al-Bashir chu African summit laia a man duh loh vangin sawisel a tawk nasa hle.