Iraq-in Sweden ambassador hnawt chhuak

Sweden khawpui, Stockolm-a Muslim lehkhabu thianghlim, Koran hal a nih avanga buaina kal zelah, Iraq sorkar chuan an rama Sweden palai awm chu a hnawt chhuak.

Iraq hian Sweden-a an ram palai, charge d'affaires pawh ko hawin, Swedish company hrang hrang an thawhpuinate pawh a titawp bawk.

Koran hal a nih avanga lungawi lo mipuite chuan Iraq khawpui Baghdad-a Sweden embassy chu a nih hnihna atan luh chilhin an bei chhunzawm leh. Embassy luhchilhtute hian embassy bangte an chei chhiat vek bakah, compound chhungah mei chhemte an awm a, police-te nen pawh an innawr buai a ni.

Iraq sorkar chuan pung khawmte chet dan chu a dem thu a sawi a, buaina siamtu zinga mi 20 an man tawh thu a sawi. Hetih lai hian Iraq prime minister Shia al- Sudani chuan Sweden chu vauin, Momika chu Koran a haltir a nih chuan ram pahnihte inkar a chhiat phah tur thu a sawi a, Sweden sorkarin an ram chhunga Koran leh Iraq flag haltir a phal chu Islam sakhaw rin dan zah lohna lian tak leh elsenna a ni, a ti. Hun eng emaw ti chhung chu Swedish kaihhnawih thil tan work permit tihtawp a ni rih dawn tih an puang a, heng zingah hian phone siamtu lar, Ericsson pawh a tel.

Sweden foreign minister, Tobias Billstorm chuan an ram embassy beih a nih dan chu uchuak a tih thu a sawi a,"Iraq thuneitute hian Vienna convention hnuaiah ram pahnih inkara thawktu leh thawhna reng reng chu an theihtawpa veng turin mawhphurna an nei a ni," a ti. US, UK leh EU pawhin Sweden embassy beih a ni chu an dem thu an sawi a, Iraq sipaite'n embassy an veng him lo chu mak an tih thu an sawi a ni.

Koran tihbawrhbangtu an tih, Salwan Momika hian thla hmasa khan Stockholm-a Mosque kawtah Koran copy hi a lo hal tawh a, tun ṭumah hian hal chiah lo mah se, Koran hi Iraq embassy kawtah hian kea rapin a sawisa kual a ni. He thil thleng avang hian Stockholm-ah nawrh huaihawt a lo ni tawh a, police-in dan tum mah se, court-in nawrh chu mipui dikna chanvo a tih avangin an nawrh chhunzawm phalsak an ni thung.

Koran avanga buaina hi Muslim tamna ram Iran, Turkey, Qatar leh Saudi Arabia te bakah Pope pawhin a ngaihven hle a, Momika thiltih hi an dem thu an sawi hlawm. Sweden-a freedom of speech an kalpui dan pawhin zir chian a hlawh phah hle a ni. Momika hian Koran hal hi a hmain a lo dil tawh a, police-te'n phal lo mah se, court-in mimal zalenna a nih thu sawiin police-te hian phalna an pe ta a ni.