Pakistan security thuruk puangzara puh Imran Khan dam chhunga tantir theih a ni dawn

Pakistan law minister Azam Nazeer Tarar chuan an ram prime minister hlui, Imran Khan chu an ram official classified document, cypher tia sawi puangzara puh a nih chungchangah thiam loh chantir a nih chuan, dam chhung lung in tantir theih a ni dawn tih a sawi.

Imran Khan hi cypher-a content ṭhenkhat chu political rally a neihnaah a sawi chhuak nia sawi a ni. Cypher hi mipui hriata sawi chhuah leh hriattir phal a ni lo a, hei vang hian Federal Invesgation Agency (FLA) chuan July 25 hian thu zawh fiah turin a ko.

Minister chuan PM hlui hian nikum March thlaa Washington-a Pakistan embassy-in a thu thawn chu a thuneihna aṭanga paih thlak a nih danah US puhna atana hmangin a sawi chhuak tih a sawi a ni. Official secret tihput chhuah chu a tlem berah kum hnih tang tura hrem tur a ni. Hemi rual hian cypher leh a content, mahni hamṭhatna tur atana mipuite hriata puanzar hi kum 14 thleng tantir theih an ni tih a sawi bawk.

Pakistan ramah chuan jail tang tura hremna pek rei theih ber chu kum 14 niin, he hremna hi dam chhung lung in tantirna anga hman a ni.

Nikum April thlaa Pakistan prime minister a nihna aṭanga paih thlak a nih hnuah, Imran Khan hi thubuai eng emaw zat siamsak a ni tawh a, an party hruaitu senior tam takin an chhuah san tawh bawk.