Judicial system siamṭhat tumna duh loin Israel-ah mipui an pungkhawm leh

Israel prime minister Benjamin Netanyahu kaihhruai sorkarin an ram judicial system siamṭhat a tumna chu nimin khan Parliament-ah sawiho a ni a, vawiinah vote lak a ni ang.

Hetih lai hian Inrinni liam ta aṭang khan ram chhunga khawpui hrang hrangah judicial system thlak danglam tumna duh lohna lantirin mipui an pungkhawm leh. Nimin zing khan East Jerusalem-a Juda-te hmun thianghlim, Western Wall-ah pawh mi tam tak chu dan siam danglam a nih lohna tura dilin an ṭawngṭai. Jerusalem-a hmun hrang hrangah Israel flag kengin human chain an siam a, Old City-a Jaffa Gate bulah pawh an pungkhawm,

Military reservist-te pawhin Parliament-ah he dan thar hi pass a nih chuan, duty turin an in report tawh dawn lo tih an sawi a, Inrinni zan khan reservist 10,000 chuan an duty tur an ṭhulh a ni. Security hotu hlui rual 100 chuang chuan PM hnenah lehkha thawnin, a dan siamṭhat tum chu tawpsan turin an ngen a, lehkha thawntu zingah hian PM hlui Ehud Barak, army chief hlui Moshe Yaalon pawh an tel.

Sorkarin judicial system siamṭhat a tumnaah hian dan hmanga rorelnaah Supreme Court thuneihna tih nep a, politician-te thuneihna sang zawk pek tum a ni. Sorkar chuan hei hi thuneihna rualkhat taka kalpuina turin a ṭul niin a sawi a, mahse a duhlotu lam chuan hei hi Israel himna atana thil pawi thei, Israel society innghah chhan tichhe thei, democracy dinhmun tiderthawng thei a ni, an ti thung. Hei bakah PM Netanyahu hi eiruk thubuai eng emaw zat nei lai mek a ni a, heng a thubuai neihte tihtawp a nih theihna hmanrua atan judicial system hi siam danglam tumah an puh bawk a, mahse PM erawh chuan a puhna hi thu dik lo a nih thu a sawi thung.

US president Joe Biden pawhin Israel PM Netanyahu chu dan siamṭhat tumna hi chawlhsan rih a, mipuiten an pawm tlan theih dan tur ngaihtuah hmasa turin a lo ngen tawh.

Hetih lai hian PM Netanyahu chu Inrinni khan pacemaker vuah a ngaih avangin damdawi-inah dah a ni a, nimina Parliament-ah bill sawihonaah pawh a tel thei lo. Kum 73 mi, Netanyahu chuan a doctor-ten pacemaker hi ṭha taka an vuah theih chuan, Knesset-a bill chungchang sawihonaah tel thei lo mah se, vote laknaah erawh a tel hman a beisei thu a sawi.