Denmark-a Quran leh Irag flag hal vangin mipui thinrimin Baghdad Green Zone luhchilh an tum

Denmark khawpui Copenhagen-a Iraq embassy kawtah Quran leh Iraq flag hal a nih vangin kar liam ta Inrinni khan Iraq khawpui, Baghadah-ah lungawi lohna lantir a ni. Mipui pungkhawmte hian foreign embassy leh Iraq sorkar hmun pawimawhte awmna, Green Zone luhchilh an tum.

Sweden rama Islam lekhabu thianghlim Quran hal tum avanga mipui thinrimin Baghdad-a Swedish Embassy an luhchilh aṭanga ni hnih a liam hnuah, Denmark-ah Quran hi ultranationalist group-in Quran an hal leh nia sawi a ni.

Nawrh huaihawtte hian Green Zone panna, Jumhuriya brige an dang a, mahse secuirty force-te chuan pungkhawmte hi an nawr let a ni. Inrinni vek khan Iraq ramchhung hmun danga nawrh huaihawtten Danish Refugee Council (DRC)-in demining project a kalpui mek ta motor (caravan) pathum an hal bawk. Civil defense responder-ten motor kang chu an ṭhelh a, mihring hliam an awm lo niin police-te chuan an tarlang.

Iraq Prime Minister chuan Sweden-a Quran hal a nih avang an inlaichinna titawpin, an rama Sweden palai awm pawh an hriattir tawh bawk.

Denmark media-in a report danin, Zirtawpni tlai khan ultranationalist group Danske Patrioter member ṭhenkhat chuan Copenhagen-a Iraq embassy hmaah Quran leh Iraq flag an hal a, an hal lai hi Facebook-ah an live bawk.

Denmark sorkar chuan he thil thleng hi an dem thu sawiin, foreign minister Lars Løkke Rasmussen chuan "mi tlemin thil atthlak tak an ti a ni," tiin a sawi. Copenhagen police thupuangtu, Trine Fisker pawhin kalkhawmte hian Iraq flag hal an tum a, mahse midang an inrawlh hnuah lehkhabu hi an hal tih sawiin, eng lehkhabu nge tih pawh an hriat mai loh thu a sawi.