Afghanistan-ah tuilian vangin mi 26 an thi

Afghanistan ram laili laia ruahsur nasa takin tuilian a thlen vanga thi chu nimin thleng khan mi 26 an tling tawh a, chin hriat lohin mi 40 chuang an awm bawk niin official-te chuan an sawi.

State ministry for disaster management thupuangtu, Shafiullah Rahimi chuan kar liam ta Zirptawpni aṭang khan ram pumah ruahsurin chhiatna a thlenah mi 31 an thi tawh niin a sawi a, in leh lo tam tak a chhe bawk a ni, a ti.

Sorkar thupuangtu, Zabihullah Mujahid chuan chhiatna thlen nasatna hmun, Maidan Wardak province-a Jalrez district-ah chhawmdawlna thawn a ni tih a sawi bawk. Jalrez district-ah hian ruahsur hian in 604 a tichhe tawh a, thlai leh thei chinna ram zau tak tuiin a chim bawk a ni.

Tun hnaiah south Asian bialah ruah sur nasa avangin ram eng emaw zatah chhiatna a thleng a ni. India, Pakistan leh China-ah pawh ruah surin harsatna a thlen a, Pakistan-ah pawh ruahsurin tuilian leh chhiatna dang a thlenah mi eng emaw zatin nunna an chan tawh.