Russia-in Nagorno-Karabakh peace talk thlen inhuam

Europe chhimchhak lam ram pahnih Armenia leh Azerbaijan inkar buaina chinfelna tura inbiakna Nagorno-Karabakh peace talk chu Russia chuan thlena kaihhruai a inhuam.

Russia Foreign Minister Sergei Lavrov chuan hemi chungchang hi sawi chhuakin ram pahnih sorkarte chuan an inhuam a nih phawt chuan Russia chu a inhawng hle tih a sawi a ni. Nilaini khan Sergei Lavrov chuan Armenia leh Azerbaijan foreign minister-te chu hemi chungchang hi a hrilh tawh tih a sawi bawk. Russian President Vladimir Putin pawhin hemi chungchangah hian French President Emmanuel Macron chu telephone hmangin a lo be tawh bawk a, ram pahnih hruaitute pawh hian a hmaa inkahhai puan a tum chungchang an sawi nawn leh ve ve bawk.

Russia hian Armenia hi sipai thuam chakna kawngah an thawhpui a, an ramah sipai hmunte pawh an nei hial a ni. Chutih rual chuan Azerbaijan sorkar nen pawh hian inkungkaihna ṭha tak an nei a, hemi vang hian ram pahnih inkara remna palai hna thawh pawh hi an inhuam hle a ni.

Armenia leh Azerbaijan inkar buaina, Nagorno-Karabakh conflict hi a inṭanna a rei tawh hle a, kum zabi 20 ṭantirh lam, Joseph Stalin hunlai aṭang daih tawha inṭan kha a ni tawh.

Tuna an buaina tak erawh hi chu kum 1988 aṭanga inṭan kha a ni a, Karabakh Armenian-te'n Karabakh chu Soviet Azerbaijan aṭanga Soviet Armenia-a sawn an phut vangin buaina a chhuak a, 90's tir lamah phei kha chuan indona a chhuah phah hial a ni.

Kum 1994 khan ram pahnih hian inkahhai an puang a, kum 20 vel lai chu daihin buaina lian tham a chhuak zui lo (buaina neuh neuh erawh a awm deuh reng). Kum 2016 April khan inkahhai bawhchhiatna nasa tak thlengin ni li chhung an indo a, mi tam tak an thih phah.

Hemi hnu hian ram pahnih inkarah hian buaina a chhuak leh fo a, kumin July thla pawh khan mi 20 dawnin an thih phah leh a ni.

Pathianni liam ta aṭang khan buaina chhuak lehin mi 100 chuang an thi tawh a, kum eng emaw zat chhunga helai hmuna buaina chhuah nasat ber a ni leh.