Spain khawpuiah lockdown puang

Covid-19 hri lengin ziaawm lam a pan mai loh avangin, Spain sorkar chuan an khawpui Madrid leh a chhehvel municipal area-ah Nilaini khan lockdawn a puang.

Lockdown puan a nih rual hian inkhuahkhirhna siam thar a ni a, Madrid-a cheng mipuite chu pawimawh tawp a nih loh chuan an awmna khawpui chhuah khap a ni. Madrid-ah hian Covid-19 hri kai mi 1,33,604 an awm a ni.

Inkaihhruaina tharah hian khawpui pawn lam aṭanga Madrid-a zin luh khap a ni bawk a, mahse mamawh leh ṭul thil erawh a huam lo. Hnathawk tur, bazar tura kal leh doctor hmu turte chu Madrid ramri hi kan phalsak an ni. "Madrid hriselna chu Spain hriselna a ni a, Madrid chu a pawimawh hle a ni," tiin Health Minister Salvador Illa chuan a sawi.

Madrid-a bar leh restaurant chu zan dar 11-a khar vek tur a ni a, park leh playground chu khar rih tur a ni. Mi paruk aia tam punkhawm khap a ni bawk. Spain khawpuiah hian mi maktaduai thum chuang an cheng a, municipal pakua in a hual bawk a ni. 

Madrid leh a chhehvel municipal area-a lockdown an puan hi tualchhung sorkara eptute chuan an duh lo hle a, lockdown puan hi dan anga puan a nih loh thu an tarlang. Lockdown puan aiah hian inkhuahkhirhna hmun 45-a hman zawk chu ṭha an tih thu an sawi. 

World Health Organisation (WHO) chuan Europe ram hrang hranga Covid-19 hri leng chu a la reh loh thu leh a darh nawn chhoh leh theih thu a tarlang a, fimkhur turin Europe ramte chu a chah bawk a ni.  Spain a Covid-19 hri kai tawh zat hi mi 7,69,188 a ni a, heng zinga mi 31,791 chuan he hri hi an thihpui tawh a ni.