Greece-ah ram kang vangin mi tam tak sawn chhuak

Greece ram hmun hrang hrangah ram a kang a, khualzinte tlawh nasat Rhode island-ah ram kang vangin tualchhung mi leh khualzin tam tak chu hmun him lamah sawn chhuah an ni.

Ram kang hi water jet leh helicopter hmanga ṭhelh mek a ni. Kangṭhelhtu 260 chuangin thawk mekin, aircraft 18 an hmang a, Croatia, France, Slovakia leh Turkey chuan kangṭhelhna tur hmanrua an thawn bakah kangṭhelhtute pawh an tir bawk. Mahse thli, darkar khata km 48-a naa a tleh tel avangin kang ṭhelh hna hi an thawk chak thei lo.

Rhode island hi Greece rama chawlh hmanna hmun lar ber zinga mi niin, khualzin tlawhtu pawh an tam thei hle. Police-te chuan ram kang vang hian he thliarkara awmte chu an theih anga insaseng tura hriattir an nih hnuah mi tam tak chu anmahni motor hmangin an chhuak a, hengte bakah thuneitute chuan motor hmangin mi 16,000 leh lawng hmangin mi 3,000 vel an sawn chhuak bawk tih an sawi.

He thliarkara cheng hi mi nuai khat vel an ni a, nikum khan khualzin tlawhtu maktduai 2.5 vel an awm.

Greece foreign ministry leh an rama embassy-te chuan khualzin, hmanhmawh thila Rhode island chhuahsan a ngaih avanga an travel document tibote pui turin Rhode airport-ah station an siam nghal a ni.

Greece ram hmun hrang hranga ram kang hi hmun 82 velah a thleng mek a, heng zinga 64 chu Pathiannia chhuak kha ni-a sawi a ni. Rhodes island bakah Evia leh Corfu island-ahte ram hi a kang tih an sawi. Thuneitute chuan ram kang ṭhelh mit tur chuan hun a ngai rei dawn tih an sawi.