Zu rui chunga motor khalhtu NZ Minister a bang

New Zealand justice minister Kiri Allan-i chu a car-a motor dang a sut hnuah alcohol breath test a paltlang zawh loh avangin minister a nihna aṭangin a bang. Kumin Marc thla hnua New Zealand minister bang palina a ni.

Kum 39 mi, Allan hi fimkhur lo taka motor khalha puhna leh, police officer-te thu a zawm duh mai loh avangin thubuai siamsak a ni zui bawk.

Pathianni zan dar 9 hnu lam khan Wellington-ah Kiri Allan hian Evans Bay Parade hmunah car dang a su a, police station-ah lak niin darkar li hnuah an chhuah leh a ni. Police-te'n alcohol breath test an neih tirah phal chin aia tam zu a in tih hriat a ni a, court-ah inlan tura tih a ni bawk.

Allan chuan a chet dan avang hian minister nih chhunzawm zel chu a tan a rem lo tih hriain banna a theh lut nghal tih a sawi a, politics lama a awm zui zel dan tur pawh a ngaihtuah dawn tih a sawi.