NKorea-in Covid-19 an do dan a ṭha tawk tih a sawi

North Korea chuan Thawhlehni khan khawvel sorkarte chu Covid-19 dona kawnga hmala ṭha turin a ngen a, an ram hotupa Kim Jong-un-a'n an rama Covid-19 a dona chu a ṭha hle tih a tarlang bawk.

North Korea UN ambassador Kim Song chuan an ram hotupa Kim-a'n  Covid-19 a do dan chu ṭha a tih hle thu sawiin, an rama Covid-19 hri leng chu a thunun thei a ni, tiin 75th U.N. General Assembly ṭan hmain a sawi. 

Covid-19 hri len chhung chu NKorea-ah hian ramdang aṭanga zin khap a ni a, hei vang hian an rama hri leng tur chu dan a nih phah thu Song chuan a sawi bawk.

Inkhuahkhirhna khauh tak hman a nih thu Kim Song chuan sawiin, an rama hri kai an awm leh awm loh erawh a sawi lang lo thung. An ram hotupa Kim chuan an rama cheng mi maktaduai 25 chuang te him theih nan hri dona kawngah hma a la ṭha hle niin Song chuan a sawi  a ni. 

NKorea-a World Health Organi­zation representative  Edwin Salvador tarlan danin September 17 thleng khan North Korea-a test neih tawh zat chu mi 3,374 an ni a, tumah hri kai an awm hriat a la ni lo. July thla tawp lam khan North Korea-ah hian an ramri bul khuaah hri kai pakhat hmuhchhuah a nih thu an ram media Korean Central News Agency (KCNA) chuan a tarlang a, hei bak hi hri kai an awm hriat a la ni lo.

Edwin Salvador chuan hri leng laka invenna atan ramri chu khar chhun­zawm zel a la a nih thu a sawi a, ni 240 chhung khar a ni tawh a ni, a ti.