Spain inthlanpuiah sorkar siam thei an awm lo

Spain ram inthlanpui neih zawh takah sorkar siam thei tura party mala chak zo an awm lo.

Inthlanah hian eptu pawl, right-wing People's Party (PP) chu seat la hnem ber a ni a, Parliament lower house, Congress of Deputies-ah seat awm zat 350 aṭangin seat 136 a la a, prime miniter Pedro Sanchez kaihhruai, rorel lai Spanish Socialist Workers' Party (PSOE) chuan seat 122 a la bawk. Sorkarna siam tur hian seat awm zat aṭanga a zahve aia tam, seat 176 tal neih phak a ngai a ni.

Vox chuan seat 33 la mah se, PP nena an thawh dun pawhin seat 176 an nei pha dawn lo a. PSOE pawhin a thawhpui, seat 31 la tu Sumar nen pawh majority an nei pha chuang lo.

Hetih lai hain PP hruaitu Alberto Nunez Feijoo chuan sorkar an siam ngei theihna turin party dangte a be dawn tih a sawi. Majority nei thei tur hian party tenau, Basque nationalist party pahnih, seat 6 leh 5 la tu, Bildu leh PNB bakah seat 7 ve ve neitu, Catalan party - JuntsXCat leh Ezquerra Republicana (ERC)-te an pawimawh dawn a ni. Mahse heng party-te hian PP/Vox thawk dun hi an thlawp tur thu an la sawi lang lo.

Inthlanpui hi Pathianni kha neih niin, vote tla hi 79% a tling a ni.