IMF-in Ecuador tan USD vbc 6.5 puk a rem ti

Ecuador president Lenin Moreno chuan Nilaini khan International Monetary Fund (IMF)-in an ram tan US dollar vaibelchhe 6.5 puk tir a remtih thu a sawi.

Hemi chungchangah hian Moreno chuan IMF zinga mi a biak thu sawiin, pawisa puk hi an phalsak tih a sawi. Kar liam ta Zirtawpni khan loan atana pawisa lak hmasak tur US dollar vbc 2 chu siam fel a ni, a ti. 

August 28 khan loan puk chungchangah hian IMF leh Ecuador te chuan inremna an ziak a, thla 27 chhung pawisa hi an puk thei dawn a ni.  

Ecuador ram hian Covid-19 hri leng vangin harsatna a tawk nasa hle a, hei vang hian IMF aṭanga pawisa puk hi an ngaih phah hial a ni. An rama Covid-19 hri leng chu thunun a nih theih nan leh he hri leng tuar nasa zualte chhawmdawl dan tur pawh rel a nih thu Moreno chuan a sawi. .

Latin America ram zinga Ecuador hi Covid-19 darh nasatna ram pariatna a ni a, nimin thlengin Covid-19 hri kai hmuh chhuah tawh  hi mi 1,37,047 an awm a, heng zinga mi 1,12,296 chu enkawl dam tawh niin, he hri vang thi hi mi 11,355 an awm tawh bawk.