Joe Biden chungah Brazil president a lawm lo

Brazil president Jair Bolsonaro chuan US Democratic presidential candidate Joe Biden-a'n Amazon ramngaw ti chereuhah an ram a puh chu a lawm lo hle tih a sawi.

US President thlanna neih tura candidate pahnih, President ṭanglai leh Republican candidate Donald Trump leh Democrats candidate Joe Biden-ten Nilaini zinga debate an neihnaah, Biden chuan Amazon ramngaw ti chereutute chu Trump leh a thawhpui Bolsonaro an nih thu a sawi a, ramdangte chuan he Amazon ram ngaw siamṭhat nan hian US dollar vaibelchhe 20 pe thei se a duh tih a sawi.

He a thusawi hian Bolsonaro a tilawm lo hle a,  an ram chhung thil leh an ram economy-a Biden inrawlh a tum chu ṭha a tih loh thu a sawi a, a hma zawng aia US leh Brazil inlaichinna ṭha a awm theih mek laia, a  tichhe zawnga thu a lo sawi chu a dem hle tih a sawi a ni.

Biden hian Trump nen debate an neihnaah hian Trump-a foreign policy chhiat zia entirnan chuan Brazil hi thlir mai tur a ni e, tiin  Brazil ramngaw ṭha tak chu tihchhiat mek a ni, a ti. 

Nikum khan Amazon ramngaw hi  a kang vak a, a kan chhan hi hriatchian a ni lo. Mithiam te sawi dan chuan khawvela oxygen 20% chu Amazon ramngaw aṭanga insiam a ni. Nikum lama a kan chhiat nual avang hian environment lamah harsatna a thlen phah thei niin mi tam tak chuan an ngai.