Sawisel hlawh US Presidential Debate

Kumin November 3-a US President thlanna neih tura candidate pahnih, President ṭanglai leh Republican party candidate Donald Trump leh Democratic party candidate Joe Biden-ten Nilaini zing, an ram huna Thawhlehni zana Presidential debate hmasa ber an neih chuan sawisel a hlawh hle. 

Trump leh Biden-te debate neih hmasa ber hi Presidential debate neih tawh zingah mumal lo leh buai ber nia sawi a ni hial. Cleveland, Ohio-a minute 90 debate neih chhung hian candidate pahnihten an policy sawifiahna aiin in ṭawngel khum leh thusawi  lai inauh buaina atan  hun an hmang tam zawk. US mipuite bakah ram hrang hrang aṭang pawhin sawiselna a tam hle. 

Presidential candidate pahnihte hian debate hi ṭum hnih an la nei leh dawn a, October 15 leh 22-ah an nei leh ang. 

Donald Trump leh Joe Biden-te presiden­tial debate hmasa ber hi TV lamah mi maktaduai 28.7 velin an thlir anga chhut a ni. Kum li liam taa Trump leh Hillary Clinton-te debate hmasa berah khan thlirtu maktaduai 45 an tling a, kuminah chuan thlirtu an tlahniam hle.

Thlirtu zat chhutnaah hian online platform aṭanga thlir chhut tel an ni lo thung. Debate hi  Twitter, YouTube, network websites leh digital platform dangah pawh live-a pekchhuak a ni. 

Candidate pahnihte hian awmze nei loa inauhbuai leh inhnialbuaia hun tam zawk an hman avangin, debate ṭum hnih an la neih turah mumal taka hun hman a nih theihna atan debate dan thlak danglam a ni. 

Presidential debate buaipuitu Commi­ssion on Presidential Debates (CPD) chuan rules thlak a nih thu hi sawiin, dan thlak tur zingah candidate pakhatin thu a sawi laiin hnial buai a nih lohna turin candidate pakhat zawk microphone chu off sak a ni ang. Guidelines thar an siam hi kimchanga tihchhuah thuai a tum a, campaign team pahnihte pawh hriattir an ni dawn a, sawibuai theih a ni lo ang. 

Khawvel ram ropui, US President thar nih tuma inkhing, Donald Trump leh Joe Biden-te hian debate-ah hian thu belhchian dawl lo, thu dik tawk lo sawichhuahte pawh eng emaw zat an nei. Chung zinga ṭhenkhatte chu -

US-a coronovirus leng mek chungchanga an inchhalnaah, President Trump chuan campaign rally a neih avanga hri darh phahna a awm lo tiin a sawi. Mahse June thla tawp lama Tulsa, Oklahoma-a indoor rally a buatsaihna chu he khuaa hri darh chhuahna pakhat niin Tulsa City-County Health Department director a sawi thung. He rally-a telte hian hmaituamna leh social distancing dante an zawm ṭhat loh avangin sawisel pawh an tawk nasa a ni. 

Democrats candidate Biden pawhin hripui leng mek dona turin Trump-a'n ruahmanna engmah a siam lo tiin a sawi bawk a, hei pawh hi thu dik lo a ni.  President Trump hian September thla  khan hri dona kawnga hma lak dan turte, vaccine semchhuah dan turah ruahmanna kimchang tak a lo siam tawh a ni.  President Trump-an school ho hnenah mask a sem tawh lo nia Biden-an a puhna a dik lo bawk a, sorkar hian programme pakhat hnuaia mask a sem chu titawp mah se, school hnena mask maktaduai 125 semna tur programme dang a kalpui mek. 

May thlaa Minnesota-a mihang  George Floyd thihna avanga ram chhunga nawrh huaihawt chhunzawm mek chungchangah pawh candidate pahnihte hian thu dik tawk lo an sawi ve ve bawk.

President Trump chuan nawrh huaihawt leh buaina thleng ṭhinah Portland, Oregon sheriff chuan a thlawp thu a sawi niin debate-ah hian a sawichhuak a, mahse sheriff hian hei hi a hnuah a twitter-ah chhang nghalin, Donald Trump chu a thlawp loh thu a sawi. 

Biden pawhin  White House kawta nawrh huaihawt a nih laiin Trump chu a bunker aṭanga rawn chhuakin, sipaite hnenah pungkhawmte chu tear gas hmangin a phuh tir niin  a puh. Hei thu hi dik lo niin, nawrh huaihawtte hnawtdarhtu hi sipai ni loin law enforcement-te an ni a, hetih lai hian Trump hi bunker-ah pawh a awm lo nia sawi a ni. 

Joe Biden chuan Barack Obama president hun lai, kum riat chhung khan an rama crime rate a tlahniam nasa a; 17% leh 15% tein a tlahniam a ni, a ti. Mahse a thusawi hi a dik lo. FBI Uniform Crime Reporting programme data in a tarlan danin, Obama president tirh aṭanga a term tawp thleng crime rate tlakhniamna chu 10% a ni. A rorel tawp lam kum hnih, kum 2014-2016 chhung phei chuan crime rate hi a san belh a, a hma aiin 8% in pawikhawihna thleng hi a pung zawk. Trump-a rorelna hnuaiah crime rate a sang nia Biden-a'n a puhna chu a dik lo a, kum 2016-2018 chhungin crime rate hi 3.5% in a tlahniam zawk. 

President Trump-a'n  1994 crime bill chungchangah Black citizen-te 'super-predator' tiin Biden chuan a sawi nia a puhna pawh a dik lo bawk. He ṭawngkam hi Biden hian a hman hriat a la ni ngai lo.