ECP-in Imran Khan manna tur thupek tichhuak

Election Commission of Pakistan chuan Thawhṭanni khan an ram prime minister hlui, Imran Khan manna tur thupek a tichhuak.

ECP chuan Imran Khan hi Election Commission rorelna kalh zawnga che leh, hriattirna leh bailable warrant a lo tichhuak tawh chung pawhin an hmaa inlan tura tihna chu zawm duh loah puhin, non-bailable warrant hi a tichhuak leh a ni.

Kum 70 mi, Pakistan Tehreek-e-Insaf (PTI) hotu Khan hi Election Commission chungchangah ṭawngkam mawi leh huatthlala tak hmanga puh a ni. Hei vang hian ECP chuan Islamabad police hotu hnenah Khan hi man a, an hnenah hruai turin a hriattir bawk.

ECP in thupek a tihchhuah hnu hian Khan chuan YouTube-ah a thusawi a tichhuak a, jail tang tura a inpeih thu a sawi. Pakistan media regulatory body-in TV-ah Khan thuchhuah a khap tawh avangin, social media platfrom hrang hrangte chu thusawi tihchhuahna atan a hmang a ni. Federal Investigation Agency hmaah a inlan dawn tih a sawi rualin, an puhna hrang hrangte chu thudik lo leh phuahchawp vek a ni, a ti bawk.

Pakistan PM a nihna aṭanga paihthlak a nih hnuah Imran Khan hi thubuai ṭhahnem tak siamsak a ni tawh a, Thawhṭanni vek khan a thubuai dang pakhatah chuan Supreme Court-in bail a dilna a phalsak thung. Thubuai hi 150 chuang siamsak a ni a, heng zingah hian firfiak zawnga chetnaa inhnamhnawiha puhnate pawh a tel.