Algeria ramah ram kang vangin mi 30 chuang thi

Algeria ram hmun hrang hrangah ram a kang a, ram kang vang hian mi 30 chuang an thi tawh a, an zingah hian kangmei ṭhelh hna thawktu sipai 10 an tel. Mi sang chuang hmun him lamah sawnchhuah an ni tawh bawk.

Interior ministry chuan Thawhṭanni khan an ram hmun 97-ah ram kang hi a thleng a, khawlum lutuk leh thli tlehin kangmei chhuak hi a tizualkai bawk tih a sawi.

Ministry chuan ram kang vang hian an ram khawpui, Algiers khawchhak lama Bejaia, Bouira leh Jijel province-ah mi 1,500 vel chu hmun him lamah sawnchhuah an ni tawh tih a tarlang. Heng province pathumte hi ram kang thlen nasatna hmunte an ni. Kangmei ṭhelh hna hi kangṭhelhtu 7,500 velte motor 350 hmangin an ṭhelh mek a ni.

President Abdelmadjid Tebboune chuan chhiat tawk chhungte a tawrhpui thu a sawi a, ram kangte chu ṭhelh mih thuai an nih theihna turin theihtawp an chhuah mek tih a sawi bawk.

Algeria ramah hian nipui khawlum zual laiin ram kang hi a thleng fo a, nikum khan an ram hmar lam, Tunisia ramri bula ram kang nasa tak avangin mi 37 an lo thi tawh bawk.