NKorea-in ballistic missile 2 kap chhuak

North Korea chuan a ram khawchhak lam tuipuiah short-range ballistic missile pahnih a kap chhuak leh niin South Korea sipai thuchhuah chuan a tarlang.

South Korea Joint Chiefs of Staff chuan nimin zing, zanlai pelh hretah NKorea hian an ram khawpui, Pyongyang bul aṭangin missile hi a kapchhuak leh niin a sawi a, hei hi kar liam ta aṭanga missile a kahchhuah ṭum thumna a ni. Nimin zinga missile pahnih kahchhuahte hi km 400 vel an thlawh hnuah, Korean Peninsula khawchhak lam tuipuiah an tla a ni.

NKorea-in missile a kahchhuah hma lawk hian, South Korea Navy chuan nuclear-propelled US submarine ,USS Annapolic chu Jeju Island-a lawngchawlh hmun a thleng tih a puang. Kar liam ta khan USS Kentucky chu SKorea-ah hian a thleng tawh bawk a, kum 1980 hnua SKorea-a US nuclear-armed submarine tirh hmasa ber a ni. He thil hi NKorea chuan na takin a sawisel a, a chhan letna atan ballistic leh cruise missile pawh kar hmasa khan a lo kapchhuak tawh bawk.