Thailand Parliament-in PM thar thlan hun tur sawn hla

Thailand Parliament chuan vawiina an ram prime minister thar thlang tura ruahmanna an lo siam tawh chu sawn hlat a nih thu a sawi.

Inthlanpui an neih aṭanga thla hnih chuang hnuah pawh Prime Minister thar tur hi thlan a la ni lo, sorkar thar a din hun tur pawh sawi lawk theih a ni rih lo.

House of Representatives speaker Wan Muhamad Noor Math chuan Constitutional Court thuchhuak avangin vawiin vote lak tum chu sawn hlat a ni tih a sawi.

Prime minister candidate, eptu pawl Move Forward Party leader Pita Limjaroenrat chu election law bawhchhiaah puh a nih chungchangah Parliament member a nihna aṭangin chawlh lailawktir a ni a, Constitution Court chuan an puhna chungchang hi a ngaihtuah dawn a ni. Mahse an party chuan PM atan hian an nominate leh dawn tho tih an tarlang.

State ombudsman chuan court hnenah hian Pita hi a ṭum hnihna atan PM atan nominate a la ni thei dawn em tih a zawt a, court chuan a ngaihtuah hun tur a la sawi loh avangin PM thar thlan tur pawh hi tihkhawtlai a ni ta rih a ni.

July 13 khan a thawh khatna atan Parliament-ah PM thar tur thlangin vote thlak a ni a, mahse, hemi ṭum hian PM ni tura vote hmuh ngai zat chu Pita hian a hmu pha lo. Kar liam ta khan vote lak thawh hnihna neih tum a nih laiin, Pita hi dan bawhchhiaa puhna chungchangah Parliament member a nihna aṭangin chawlh lailawktir a ni ta a ni.