Algeria, Italy leh Greece-te ram kang vangin buai mek

Algeria, Italy leh Greece ramte chu ram kang vangin an la buai mek a, heng ram pathumah hian ram kang avanga thi mi 40 an tling tawh a, mi tam tak hmun him lamah sawn chhuah mek an ni bawk.

Greece-ah hian Rhode island-a cheng leh khualzinte chu ram kang vang hian hruai chhuah an ni a, hetih lai hain Corfu leh Evia island-te pawh ram kang hian a tibuai hle. Khaw lumin ziaawm lam a pan thei lo a, nimin khan Greece ram chhung hmun tam takah khaw lum lam chu 44C chung lam a tling.

Algeria ram bikah chuan ram kang vang hian mi 34 an thi tawh. Thuneitute chuan ram kang 80% chu an ṭhelh mit thei tawh niin an sawi a, kang ṭhelh hna mi 8,000 velin an thawk a, kangṭhelh motor bakah thlawhtheihnate hman tel a ni. An ram ṭhenawm, Tunisia-ah pawh ram kang avang hian tuipui kam khua, Melloula-a cheng mi 300 chu sawn chhuah an ni.

Italy ram chuan khaw lum lutuk tuar mekin, an ram hmar lamah ram a kang nasa a, thli a tleh tel bawk avangin kangmei hi thunun a la harsa hle. Hmun ṭhenkhatah khaw lum lutukin a thlen ram kang an tawrh mek laiin, ram chhung hmun ṭhenkhat erawh thlipui tlehin a tibuai mek bawk.

Italy civil protection minister Nelle Musumeci chuan, "Italy chuan hun harsa leh buaithlak tak kan tawng mek a ni. Hmar lam chu thlipui tleh leh rial nasa tak tlain a tibuai a, hetih lai hian ram laili leh chhim lam erawh khaw lum lutuk leh ram kangin a tibuai mek thung," tiin a sawi. EU hnenah kangṭhelh tura pui turin a dil dawn tih a sawi.