NKorea-in China leh Russia palaite an ram tlawh turin a sawm

North Korea ram chu Covid hri leng avanga hun rei tak a inlak hran hnuah, Korean War vawi 70-na champha a hmannaa telpui turin an ram ṭhianṭha, China leh Russia palaite a sawm a, a sawmna angin ram pahnih palaite hi an zin a ni.

NKorea ram tlawhtu zingah hian Russia defence minister Sergei Shoigu leh China Communist Party Politburo member Li Hongzhong pawh an tel. NKorea ram hun pawimawh, a ralthuam hrang hrang a pholanna, vawiina military parade an neih chu an hmanpui ang.

Covid-19 hri a len hnuah Russia leh China palaite hi North Korea rama ram dang palai kal hmasa ber an ni. NKorea pawhin US leh a thawhpui ramte nen a inep mekna karah, heng ram pahnihte hi inzawmna nghet zawk siampui a tum a ni.

US chuan Russia leh Ukraine ram indo meknaah, NKorea chu Russia hnena ralthuam pe ṭhinah a puh a, heng zingah hian infantry rocket leh missile pawh a tel niin a sawi. Mahse US puhna Russia leh NKorea chuan an pha ve ve thung.

Vawiina Pyongyang-a military parade neih turah hian sipai 15,000 vel an tel dawn a, ralthuam hrang hrangte pholan a ni ang.