Japan-ah ram dang mi inbengbel an pung

Japan-ah an rama mihring awm zat a tlak hniam zel laiin, ram dang mi an rama inbengbel erawh an pung chho zel thung.

Japan sorkarin nimina data a tihchhuahah, an ram mipuite punna a zawnin a kum 14-na atan a tlahniam leh a, resident registration data aṭanga a lan danin kumin January 1 khan an rama Japan mi awm zat chu maktaduai 122.42 niin, kum hmasa aia a tlak hniamna hi nuai 8 vel a tling.

Ministry of internal affairs and communication-in a tarlan danin, a ṭum khatna atan ram chhunga prefecture awm zawng zawng 47-ah mihring awm zat hi an tla hniam.

Hetih lai hian kum khat chhung hian Japan ramah ram dang mi inbengbel, foreign resident erawh 10.7%-a pungin, mi maktduai 2.99 an tling tawh. Kum 10 chuang liam taa data mumal tak an siam aṭanga kum khata foreign resident an pun nasat ber kum a ni. Covid-19 hri len hma khan Japan rama ram dang mi khawsa chu mi mtd 2.87 vel an ni.

Japan rama mihring awm zat Japan mi leh ram dang mi chhiar telin, an vaiin mi maktaduai 125.42 an ni a, kum hmasa lam aia an kiamna hi 5,11,000 a ni. Kum 2008 aṭang nau piang an tlem chhoh zel avangin an ram mihring punna hi a tla hniam zel tawh. Sorkar chuan nau piang an pun chhohna atan kawng hrang hrangin hma a la mek a ni.