Niger sipaite'n an President Mohammed Bazoum paihthla

Africa khawthlang ram, Niger ram sipaite chuan an ram president Mohammed Bazoum leh a kaihhruai sorkar an paihthla tih national TV-ah an puang. Ramri-te kharin, an ram pumah curfew an puang zui bawk.

Sipai hotu, colonel-major Amadou Abdramane chuan an ram huna Nilaini zan khan TV-ah thu sawiin, security force-te chuan sorkar an paihthla tih sawiin, hei hi an ram security dinhmun chhe zel leh, ram inrelbawlna leh economy dinhmun chhe lutuk avanga hetiang dinhmun hi thleng an nih thu a sawi.

Ramri kharin, curfew-te an puan nghal bakah, an ram danpui chu ṭhiah a nih thu leh, ram chhunga zirna in zawng zawng pawh khar a nih thu a sawi bawk a ni.

President leh a kaihhruai sorkar paihthlatu, Abdramane kaihhruai pawl hi National Council for the Safeguarding of the Country an inti a, an rama thil thlengah ram dangte inrawlh lo turin an vau nghal bawk. Preisdent Bazoum hi sipaite hian Presidential palace-ah an hreng mek a ni.

Sipaite'n TV-ah an ram President an paihthlak thu an puan hnuah, US secretary of state Antony Blinken chuan President Bazoum hi chhuah nghal turin a phut. UN secretary general Antonio Guterres pawhin President hi a biak thu leh, UN chuan a theih anga a puih tur thu a sawi bawk.