Car 3,000 dawn phurtu lawng lian a kang

Netherlands tuipuiah nimin khan car 3,000 dawn phurtu lawng lian a kang a, lawnga thawktu mipa pakhat a thih bakah mi dang eng emaw zat an hliam.

He lawng lian, Panama registered Fremantle Highway hi Germany aṭanga Egypt pana kal a ni. Lawng neitu, Japan-a Shoei Kisen chuang lawnga thawktu mi 21-te chu India mi vek niin an sawi.

Lawng kang ṭhelh tur hian chhanchhuah hna thawktute chuan tuiin an phuh a, mahse, tui phuh hnem lutuk chu a pil palh a hlauhthawnawm bawk si niin an sawi. Lawng kang ṭhelh mit vek tur chuan ni eng emaw zat a awh maitei tih an sawi bawk.

Kangmei chhuah chhan tak hi hriatchian a la ni lo a, mahse, electric car awmna bul aṭanga chhuak ṭan tih an sawi. Lawnga motor an phurh, 2,857 zinga 25 chu electric car a ni.