Russia President-in October-ah China a tlawh dawn

Russia Parliament, Kremlin official chuan president Vladimir Putin-a'n October thlaah China tlawh a tum tih a sawi.

President Putin-a foreign policy adviser, Yuri Ushakov chuan China-a President zin hun tur hi 'One Belt, One Road' forum nena innang tura ruahman a ni dawn tih a sawi a, President hian Turkey president Recep Tayyip Erdogan hnena a lo tiam tawh tihpuitlinna atan Turkey ram pawh tlawh a tum a, a hun tur erawh ruat fel a la ni lo, a ti.

Russia-in Ukraine ram a run hnuah, ram tam zawk chuan Russia nena an inzawmna tichatin, hreknate an siam a ni. Hetih lai hian ram tlemte, an inzawmna la chhu chat loh zingah China hi a tel. Thla sarih liam taah khan ni thum chamin China president Xi Jinping chu Moscow-ah a zin a, nikum September thla khan Uzbekistan-a summit neih denchhenin hruaitu pahnihte hi an an lo inhmu tawh bawk.

China hian Russia-Ukraine indona thleng mekah ṭan bik lam nei loa ding a nih thu sawi mah se, Russia chet dan demna thuchhuah erawh a la siam lo a, nikum khan Russia nen hian tawp chin nei lo ram inṭhianṭha an ni tih a sawi. Khawthlang ramte'n Russia ram hrekna an siamte chu a sawisel a, NATO leh US chu Putin-a tithinurah a puh bawk a ni. Indo mek ram pahnihte'n inremna an neih theihna ruahmannate pawh a siam a, mahse, hei hi Ukraine thlawp ramte chuan an pawm lo.