Ghana-in thi tura hremna pekna dan titawp

Ghana Parliament chuan thi tura hremna, death penalty pek theihna dan chu a titawp ta. Africa ram eng emaw zat chuan death penalty hi an lo titawp tawh a ni.

Criminal Offences Act siam ṭhatna bill hi MP Francis-Xavier Sosu chuan pu lutin, Parliament-a Committee on Constitutional, Legal and Parliamentary Affairs chuan a thlawp a ni.

Ghana ram danah hian tualthattu chu tihhlum tur tih a ni. Thi tura an chungthu relsak tawh, mipa 170 leh hmeichhia paruk an awm mek. Mahse he dan hi tihtawp a nih tak avangin heng mite hremna hi dam chhung lung-in tang tura thlak a ni dawn a ni. Ghana rama thiam loh chang, tihhlum hnuhnun ber chu kum 1993-ah khan a ni.

Ram mipuite ngaihdan lakah pawh death penalty tihtawp duh hi a tam zawk an ni.