Russia leh China official-te'n NKorea military parade hmanpui

North Korea chuan Korean War tawpna champha vawi 70-na puala 'Victory Day' a hman ṭhin chu Ningani zan khan hmang lehin, an ram khawpui Pyongyang-ah military parade pui tham tak a buatsaih leh. He hun hi an rama cham mek, Russia leh China official-te'n an hmanpui.

Russia defence minister Sergei Shoigu leh Chinese Communist Party Politburo member Li Hongzhong-te chu NKorea ram hun pawimawh hmanpui tur hian a zin a, nimin khan NKorea ram hotu lu ber Kim Jong-un hoin parade hi an thlir a ni.

Parade-ah hian NKorea chuan a ralthuam neih ṭhat hrang hrangte a pholang bawk a, heng znigah hian Hwasong-17 leh Hwasong-18 intercontinental ballistic missile-te pawh an tel. Heng missile-te hi US ram khawi hmun pawh kap pha nia sawi an ni. Parade-ah hian spy drone thar chi hnih pawh pholan a ni bawk.

NKorea hian Hwasong intercontinental ballistic missile (ICBM) hi April thla khan hlawhtling takin a lo enchhin tawh a, solid propellant hmang niin liquid fuel hmang ai chuan a chak zawk a ni.

Russia leh China palaite hi Kim Jong-un sawmna anga zin an ni a, Covid-19 hri len hnua ram dang palai North Korea ram tlawh hmasa ber an ni. NKorea-in military parade neihna hmanpui tura ram dang a sawm hnuhnun ber chu kum 2018 daih tawhah khan a ni.

Parade-ah hian defence minister general Kang Sun Nam chuan thu sawiin, US leh a thawhpui ramte chu Korean peninsula boruak tichhe zualah a puh. Hetih lai hian US chuan Russia leh Ukraine ram indo mekah, NKorea chu Russia hnena indona tur ralthuamte peah a puh ve thung. Mahse Russia leh NKorea chuan US puhna hi an pha ve ve a ni.