Singapore-in heroin gram 31 kawltu an man khaihlum

Singapore sorkar chuan nimin khan ruihhlo, heroin gram 31 kawltu an man, kum 45 mi Saridewi Binte Djamani-i chu a khaihlum. Hei hi kum 20 dawn hnua sorkarin thiam loh chantir hmeichhia a khaihlum hmasa ber a ni.

Central Narcotics Bureau chuan Saridewi Binte Djamani hi kum 2018 khan heroin, gram 30.72 a kawl avangin tihhlum turin a chungthu relsak a lo ni tawh tih a sawi. Human rights group hrang hrangte chuan thi tura hremna pek a ni hi sawiselin, Singapore-in ruihhlo kawl leh tawlhte capital punishment a pek ṭhin chu international law kalh a nih thu a sawi a, death penalty a pek ṭhin chu titawp turin an phut a ni.

Hetih lai hian Singapore sorkar chuan death penalty a hman ṭhin chu an rama ruihhlo hluar leh tawlh luh ṭhin venna turin a pawimawh niin a sawi thung a, mipui lakah pawh a tam zawkin he dan hi an thlawp a ni, a ti.

Kum 2022, March aṭang kha Singapore hian ruihho kaihhnawihah mi 15 a khaihlum tawh a, an zingah hian ram dang mi pawh an tel. Nilaini khan kum 57 mi, Mohd Aziz bin Hussain chu heroin gram 50 mansak a nih avangin khaihlum a lo ni tawh bawk.