Bangladesh-a nawrh huaihawtnaah buaina a chhuak

Bangladesh khawpui, Dhaka-a prime minister Sheikh Hasina ban phuta nawrh huaihawtte leh police-te innawr buaiin, police-te chuan pungkhawmte hnawh darhna atan rubber bullet leh tear gas-te an hmang. Mipuite hian lungin police-te hi an bei bawk.

Eptu pawl, Bangladesh Nationalist Party (BNP) mi leh sate chuan an ram inthlanpui buatsaih a nih hma ngeia PM hi bang tura phutin Inrinni khan nawrh an huaihawt leh a, bus-te an hal bakah petrol bomb-te an tipuak niin police-te chuan an sawi. Zirtawpni pawh khan an ram chhung hmun hrang hrangah nawrh hi an huaihawt bawk a ni. Nawrh huaihawt vang hian Dhaka leh khawpui dangte inkalpawhna pawh a nghawng buai hle.

BNP chuan police-te nena an innawr buainaah an party mi leh sa ṭhahnem takin hliam an tuar niin an sawi a, police-te pawhin officer 20 an hliam tih an sawi bawk. Police-te hian mi 90 vel an man a, an zingah hian BNP senior leader pahnih, Goyeshwar Roy leh Amanullah Aman an tel a, mahse a hnuah chhuah leh nghal an ni thung.

Kum 2009 aṭang khan PM Hasina kaihhruai Awami League hian Bangladesh-ah ro an rel tawh a ni. Sorkar hi human rights palzutah puh a nih fo bakah, eiruknaa inhnamhnawih nasa leh, rorelna kawnga inluling lutukah puh a ni. Hei vang hian eptute chuan an ram inthlanpui neih hmain sorkar chu bang a, caretaker sorkar hnuaia inthlan hi neih an phut a ni. An ram inthlanpui hi nakkum January-a neih tur a ni.

Khawthlang ramte pawhin Bangladesh sorkar chet dan hi an lo sawisel fo tawh a, rorellai party chu inluling lutukah an puh. Security force-te pawh sorkar sawiseltu, eptu pawlte sang tel man leh, sorkar hriatpuinaa an zinga tam tak tihhlumah puh an ni bawk. Kum 2021 khan US chuan Rapid Action Battalion (RAB) security force leh senior officer pasarihte hrekna a lo siam tawh bawk.

BNP hruaitu leh prime minister hlui, Khaleda Zia hi eirua puha chungchangah pawn chhuak thei loin, house arrest-a hren mek a ni.