Saudi Arabia-in Ukraine summit buatsaih dawn

Saudi Arabia chuan Ukraine dinhmun sawiho turin August thla hian summit a buatsaih dawn a, he huna tel tur hian khawthlang ram hrang hrangte a sawm.

August 5 leh 6-a Jeddah-a meeting neih turah hian ram 30 vel aṭangin senior official-te an tel dawn a, an zingah hian Indonesia, Egypt, Mexico, Chile leh Zambia-te pawh an tel. Britain, South Africa, Poland leh EU chuan an tel tur thu an tichiang tawh a, US national security adviser Jake Sullivan pawh US aiawhin a tel ang.

Ukraine leh khawthlang ramte chuan Jeddah-a meeting neihah hian Russia-Ukraine indo meknaah boruak ṭha a awm a, Ukraine tana thil ṭha tur an sawiho theih ngei an beisei thu an sawi. Hetih lai hian he summit-ah hian Russia erawh sawm a ni lo thung.

May thla khan Ukraine president Volodymyr Zelenskyy chu Jeddah-a Arab League summit-ah telin, Russia-in an ram a run meknaah Arab ramte chu Ukraine thlawp turin a lo ngen tawh a ni. Arab ram tam zawk hian Ukraine leh Russia ram pahnihte chungchangah an ṭanlam hi sawi loin, a laiah an din thu an sawi.