Pakistan rally neihnaa thihchilh bomb puakah mi 44 an thi

Pakistan hmar thlang lam, Bajaur district-a Khar khuaa political rally neihnaah thihchilh bomb a puak a, mi 44 an thi a, mi dang 200 dawn an hliam.

Rally hi Pathianni khan neih a ni a, conservative Jamiat Ulema-e-Islam (JUI-F) party buatsaih a ni. Eng pawl mahin thihchilh bomb tipuaktu an nih thu an la sawi lang lo.

Provincial police-te chuan bomb paitu hian party senior leader rualte ṭhutna, stage bulah a bomb pai hi a tipuak tih an sawi a, he pawikawihnaah hian ISIL group an inhnamhnawih mai theih thu leh, chhui zui mek an nih thu an sawi.

Afghanistan president Ashraf Ghani kaihhruai sorkar paihthlak a nih hnuah, ISIL group hi Pakistan ṭhenawm, Afghanistan ramah hian an chetla nasa hle a ni. Taliban kaihhruai sorkar chu dodalin, an member-te pawhin Peshwar area-ah biruin pawikhawihna an thlen fo nia sawi a ni bawk.

Rally-naa pawikhawihna rapthlak tak thlen hnu hian Bajaur leh a chhehvel bialah emergency puan nghal a ni a, hliam tuar na zualte chu sipai helicopter hmangin province khawpui, Pehswar hospital panpui an ni.

Prime minister Shehbaz Sharif chuan pawikhawihna thleng a dem thu leh, thi chhungte a tawrhpui thu a sawi a, an rama remna leh muanna a awm theihna turin firfiakte leh an thurualpuite chu nuaibo an ngai a ni, a ti.