Niger sipai thlawptute'n France embassy an bei

Niger-a president Mohamed Bazoum leh a kaihhruai sorkar paih thlatu, Niger sipai thlawptute chuan Pathianni khan an ram khawpui, Niamey-ah kawng an zawh a, France embassy beiin an kawngkhar an hal.

Kum 1960 thleng khan Niger hi France colony a ni a, independent ram an nih hnuah pawh Niger ram sipaite thawhpuiin France sipai 1,500 vel an la awm chhunzawm reng a ni. Anni bakah US leh Europe ram dangte pawhin Niger sipaite hi training an pe bawk.

Mohamed Bazoum hi kum hnih liam ta khan democracy hmangin Niger President atan thlan tlin a ni. Mahse kar liam ta Nilaini khan sipai member ṭhenkhat chuan Bazoum hi an ram hruaitu aṭangin an paihthla tih puangin, Zirtawpni khan Gen. Abdourahmane Tchiani chu an ram hruaitu thar atan an puang a ni. Bazoum chu an rama firfiakte pawikhawihna thlengte dang zo lo leh, an ram himna venghim thei loah puhin an paihthla tih an sawi.

France president Emmanuel Macron chuan Pathiannia France embassy beih a nih chu an en liam mai dawn lo tih sawiin, France mite'n beih an tawk a nih chuan an chhang let nghal dawn tih a sawi bawk.

Pathianni vek khan Abuja, Nigeria-ah West African loc, 'ECOWAS' chuan emergency meeting neiin, Niger nena an inlaichinnate an titawp a, President Bazoum chu kar khat chhung ngeia a dinhmun ngaia dah leh a nih loh chuan, sipai chakna an hmang dawn tiin an vau zui a ni. African Union pawhin Niger civil sorkar paihthlatu, sipaite chu mipuite thlan lal sorkar hnena thuneihna pe let leh turin ni 15 hun a pe bawk a ni.