China hmar lamah ruah sur nasa vangin 'red alert' puang

China hmar lamah ruah sur nasa avangin Beijing leh a chhehvel bialah nimin khan 'red alert' puan a ni a, ruahsur hian car-te a hnawl bakah, subway station-te pawh tuiin a chim a ni.

Kar liam ta Zirtawpni aṭang khan China hmar lamah hian ruah nasa takin a sur a, nimin thleng khan a la sur chhunzawm a ni. Thuneitute chuan mipuite pawh pawn chhuak lo turin an ti. Beijing khawpuiah bus service tam tak dintir an ni a, city government chuan Dashihi lui lama chengte chu tuilian thleng mai thei a ni tih hrilhin warning a tichhuak bawk.

Official-te'n hnathawktute chu in lam aṭanga thawk tura an hriattir avangin nimin khan Beijing kawtthlerte pawh ṭum dang aiin a reh a, motor tlan chhuak an tlem hle.

China hian kumin nipuiah hian ruah sur nasa avangin harsatna a tawk fo tawh a ni. Expert-te chuan ruah a sur chhunzawm zel chuan kkum 2012, July thlaa tuilian nasa thleng, mi 79 an thih phahna leh mi sing tel sawn chhuah an ngaih phahna aia dinhmun ṭha lo zawk an tawng thei niin an sawi.

Inrinni zan leh nimin chawhnu lam thleng khan Beijing-ah ruah mm 170.9 a sur tawh a ni, hei hi ṭum danga July thla puma ruah tla zat dawn a tling tawh.