A thubuai 19 zinga 5-ah Suu Kyi-i ngaidam

Myanmar-a thuneihna chang mektu, sipai sorkar chuan an ram hruaitu hlui, Aung San Suu Kyi-i chu a thubuai 19 zinga pangaah a ngaidam.

Suu Kyi hi sipaite'n civil sorkar thuneihna hnehchhuh a ro an rel hnuah thubuai tam tak siamsak a ni a, a thubuai 19-ah hian thiam loh chantir vekin, hremna hrang hrang an pek aṭangin a tan hun tur hi kum 33 zet a tling.

Myanmar sipai sorkar chuan Buddhist Lent pualin tang 7,000 chuang a ngaidam dawn tih nimin khan a puang bawk.

Suu Kyi-i hi Naypyidaw tan in aṭangin kar liam ta khan a chenna inah house arrest-a dah a a ni.

Kum 2021, February 1-a sipaite'n civil sorkar an paih thlak hnu khan Suu Kyi hi hren nghal a ni a, hun rei tak a inah hren a nih hnuin Naypyidaw tan inah dah a ni a, mahse, a inah bawk sawn let leh a ni ta a ni. Thubuai tam tak siamsak niin, heng zingah hian election law bawhchhia, mipuite buaina siam tura fuih, official Secret Act bawhchhia leh eirua puhnate a tel. Thubuai 19-ah thiam loh chantir a ni tawh. Mahse Suu Kyi chuan an puhna hrang hrangte hi thu dik lo vek niin a sawi thung.

Myanmar sipai sorkar chuan Suu Kyi hi a thubuai ṭhenkhatah ngaidam mah se, house arrest-in a hreng chhunzawm zel dawn. Kum 78 mi Suu Kyi hian thubuai dang 14 hmachhawn tur a la nei a ni.

President hlui, Win Myint pawh sipai sorkar chuan a hremna a tihnepsak bawk.

Sipaite'n civil sorkar thuneihna an hnehchhuh hian Myanmar rama tualchhung buaina thleng chu a la reh thei lo a, sipai sorkar dodaltu leh sipaite inbeihnaah hian mi 3,800 chuang an thi tawh a, mi maktaduai 1.6 chuang chu himna zawngin an tlanchhe tawh bawk.

Inthlan neih hun tur sawn hla

Myanmar sipai sorkar chuan civil sorkar paihthlak a nih hnuah tun thla, August thlaa an ram inthlanpui buatsaih a lo tiam tawh chu a sawn hla leh nia sawi a ni.

Sipai hotu lu, general Min Aung Hlaing chuan Thawhṭanni khan National Defence and Security Council (NDSC) chu meeting neihpuiin, an rama state of emergency an puan chu thla ruk dang an pawtsei leh.

Meeting zawha sipai sorkarin thuchhuah a siamah, tualchhung buaina leh tharum thawhnate a la thlen fo avangin inthlan neih hun tur hi sawn a ni tih a tarlang. "Inthlanna dik leh felfai tak, mipuite'n hlauhthawnna engmah an neih lohna tur buatsaih tur chuan security lamah tihfel turte a la awm a, hei vang hian state of emergecy pawh pawhsei a ngai leh a ni," a ti.