Taliban leh US official-te inbia

Afghanistan-a rorel lai, Taliban hruaitute leh US official-te chuan Thawhṭanni khan Qatar-ah an inbia a, hei hi kum hnih liam taa Taliban sorkar a din hnua ram pahnihte'n official-a inbiakna an neihna hmasa ber a ni.

Afghan ministry of foreign affairs chuan ram pahnih aiawhte ni hnih awh inbiakna an neihah hian US-in Afghanistan hrekna a siam, a bikin zin veivah khapna a siam tawh hlih leh Afghan central bank thil neihte khawih an kuta hlan let chungchangte an sawiho tih a tarlang. Hei bakah hian ruihhlo tawlh leh human rights chungchangte pawh an sawiho bawk.

Taliban hian kum 2021, August thla khan Afghanistan-a khawthlang ramte thlawp sorkar chu paih thlain thuneihna an chang a, mahse, tun thengin eng ram mahin Taliban kaihhruai sorkar hi an la pawm lo.

US bakah ram hrang hrangte'n Afghanistan ram hrekna hi an siam zui a, US hian New York-a Federal Reserve Bank-a Afhan central bank fund neih, USD tld 7 vel chu khawih chet theih loh turin a hreksak tel a ni.