Pakistan PM-in interim PM atan 'neutral' a thlang dawn tih sawi

Pakistan prime minister Shehbaz Sharif chuan an ram inthlanpui neih tur lang tlang taka kalpui a nih theihna tura interim government hruai turin ṭan lam nei lo, 'neutral' dik tak a thlang dawn tih a sawi.

Interim prime minister atan finance minister ni lai, Ishaq Dar ruat a ni dawn nia sawi thawm awm chu PM Sharif hian chhangin, midang daih ruat a ni dawn tih a sawi a ni.

Pakistan Muslim League-Nawaz (PML-N) party president ni bawk, Sharif chuan a u, kum 2019 aṭanga London-a tlan chhia, PM hlui Nawaz Sharif chu Pakistan-ah a kir leh dawn tih a sawi a, inthlanpui lo awm turah a party chu an chak a nih chuan Nawaz Sharif chu Prime Minister-ah a awm dawn a ni, a ti.

PM Sharif chuan inthlanpui neihna tura inbuatsaihna kalpuina turin, August 12 zanlaia an term a tawp hmain an ram parliament, National Assembly (NA) ṭhiahna tur hriattirna chu president Arif Alvi hnenah pek a ni dawn tih a sawi. An thawhpui party-te bakah National Assembly-a leader of opposition Raja Riaz-te nena inbiak rawn hnuah, caretaker government din hi an remti tlang tih a sawi.

Sharif chuan, 'Interim PM atan neutral mi ngei ruat a ni dawn a, hei hian inthlanpui lo awm turah pawh sawisel leh rinhlelhna awm ṭhinte a tireh ang," a ti.