2020 inthlana a chak lohna thlak tumah puhin US President hlui Trump thubuai siamsak

US president hlui Donald Trump chu kum 2020-a US President inthlana a chak loh hnuah, inthlana a chak lohna pawm tlak loh nia sawia thlak danglam tuma puhna thubuai siamsak a ni.

Trump hi hemi kaihhnawihah hian thubuai pali siamsakin, witness-te thusawi tihdanglam leh, citizen-te rights kalh zawnga thiltihahte puh tel a ni bawk.

Election investigation hian thla hnih chhung, inthlana Joe Biden a hneh zawh loh aṭanga result puan hnua Washington DC-a Trump-a thlawptute'n buaina nasa tak an chawh chhuah inkarte a thlurbing a ni. Inquiry hotu, special counsel Jack Smith chuan, "Kum 2021, January 6-a kan ram khawpui beih a nih khan American democracy beihna a ni," a ti. He buaina chhuakah hian Trump chu mawhphurtuah a puh bawk.

Trump hi a thubuai chungchangah vawiin hian Washington DC-a federal court-ah a inlan ang.

Hetih lai hian kum 77 mi, Republican politician Trump chuan tihdik loh engmah a nei lo tih a sawi thung a, an laka thubuai siam chu thil awm ang lo tak a ni, a ti. Trump hian nakkuma US President inthlan neihna turah chuh leh a tum a ni. Trump campaign pawhin an puhna chu phuah chawp mai a ni tiin, eng vanga thubuai siamsak tura kum hnih leh a chanve zet nghak nge an ni tih a zawt let bawk. "Hetianga dik lo taka politics hmanga beihna hian President Trump hi a dang thei dawn chuang lo," a ti.

Trump hi criminal charge siamsak ni mah se, inthlanah a chuh chhunzawm thei a, President atan pawh thlan theih a ni tho bawk a ni.

Federal prosecutor hlui, Melanie Sloan chuan Trump-a puhna hian Republican zingah nghawng a neih vak a ring lo tih sawiin, Trump-a thlawptute chu a lakah an rinawm zui a ring tih a sawi. Tam tak chuan an puhna pawh hi an awih lo a, Trump-a'n a lo sawi tawh angin inthlanah pawh khan a chak zawkin an ngai a ni, a ti.

Kumin April thla khan Trump hi a business record dik lo taka report a puhin thubuai siamsak a lo ni tawh a, US President ni tawh zinga criminal case siamsak hmasak ber a ni.