China-in kum 140 chhunga ruah sur nasat ber a tawng

China capital region-ah ruah nasa takin a sur chhunzawm a, kum 140 chhunga ruah a sur nasat ber ṭum niin, tuilian vangin mi 20 an thi tawh a, chin hriat lohin 27 an awm mek.

Thuneitute'n an record danin, kar liam ta Inrinni aṭanga nimin zing thlen khan Beijing-ah ruah 744.8 mm (29.3 inches) a sur tawh a, kum 1981 hnuah a sur nasat ber a ni. Darkar 40 chhunga ruah sur hi ṭum danga July thla puma ruahsur zat nen a intluk thuak a ni.

Nimin khan Beijing aṭanga chhimthlang lam, km 60 vela hla Zhuozhou aṭangin mi tam tak hmun him lamah sawn chhuah an ni. Beijing leh Hebei province aṭangin tuilian tuar, mi maktaduai khat dawn chu sawn chhuah an lo ni tawh bawk.

China president Xi Jiping chuan local government-te chu ruah sur nasa leh tuilian avanga nunna chan a tlem thei ang ber an awm theihna tura hma la tur leh, chhanchhuah hnate rang taka kalpui turin a chah.

China hian kum 1998 khan tuilian avanga chhiatna nasa tak lo tawk tawhin, an ram hmarchhak lamah Yangtze River leh lui dangte a len avangin mi 4,000 in nunna an chan a, mi maktaduai 15 vel chu chenna in nei loin an awm phah tawh bawk a ni. Kum 2021 khan Zhengzhou leh Henan province-ah tuilian vangin mi 300 chuang an lo thi tawh bawk.