Khaw lum lutuk avangin Iran-ah ni 2 chhung holiday puang

Iran sorkar chuan khaw lum lutuk avangin nimin leh vawiin atan holiday a puang. Kum upa zawk leh hriselna ṭha vak lote chu pawn chhuak lo turin a chah bawk.

Iran-ah hian a bikin chhim lama khawpuiah khaw lum hi a zual hle a, Ahvaz khuaah phei chuan tunkar hian khaw lum lamin 51C a tling a ni.

Sorkar thupuangtu, Ali Bahadori-Jahromi chuan khaw lum lutuk avang taksa lama harsatna tawk tam tak an awm tih sawiin, hospital-te pawh inring reng tura hriattir an ni, a ti.

Ram hrang hrangah khaw lum hi a zual hle a, scientist-te chuan khaw lum zual lutuk hi mihringte thlen climate change nghawng zel a nih thu an sawi.

South Korea-ah khaw lum lutuk avangin kar liam ta chhung khan mi 17 an thi a, an zinga a tam ber chu kum upa zawk, chhun ni sen sa hnuaia lo lama hnathawkte an ni. June thla lai hawl aṭang khan South Korea hian khaw lum nasa tak hi a tuar a, ram chhung hmun tam takah khaw lum lam hi 35C chung lamte an ni.