US-in Niger-a an embassy chhuah san ṭan
Niger ram sipaite'n an President paihthlaa rorelna an chelh hnuah, an rama ram dang mi awm eng emaw zat chuan an chhuahsan tawh. US pawhin Niger-a an embassy-a hnathawkte chu embassy chhuah san turin a hrilh a, thawktu ṭhenkhat chu an ram lamah an haw tawh a ni.
UK Foreign office pawhin an embassy staff ṭhenkhat chu venthawn thilah Niger ram chhuah san turin a hriattir bawk. Sipaite'n thuneihna an chan hnuah, kar liam ta khan France embassy chu beih a lo ni tawh a ni.
US Secretary of state, Anthony Blinken chuan Niger President paih thlak tak, Mohamed Bazoum chu Nilaini khan biain, US chuan Niger-a mipui thlan sorkar rorelna tung ding leh tura theihtawp chhuah a inhuam thu a hrilh.
Embassy thupuangtu, Matthew Miller chuan thawktu ṭhenkhat hruai haw ni tawh mah se, US embassy chu hawn a la ni reng dawn tho tih a sawi. "Niger mipuite nena kan inzawmna hi a ṭha em em a, he inzawmna hi tihchhiat pawh kan duh lo. Niger-a roreltute nen pawh ṭha takin kan la inbe chhunzawm reng a ni," a ti.
US hi Niger-a venhimna leh ṭanpuina pe nasa ber pawl ram a ni a, sipaite'n thuneihna an chelh hnuah an ṭanpuina pekte hi tihtawp mai theih a nih thu an sawi. Niger ram lo awp ṭhin, France leh EU pawhin sum leh hmasawnna hnathawh kawnga Niger an puihna zawng zawng chu sorkar paihthlak a nih hnuah an lo titawp tawh bawk.
West Africa ram 15, sumdawnna lama inzawm khawm, Economic Community of West African States (Ecowas) chuan Niger ram hrekna siam ve nghal bawkin, sumdawnna bungrua leh thil reng reng kaltir an phal tawh lo a, regional central bank-a Niger thil neihte pawh khawih chet theih lohin an siam a ni. Ecowas hian Niger sipai hotute nena inbe tur hian Nilaini khan Niger ramah palai an tir a ni.
Niger sipai sorkara hotu lu ber, Gen. Abdourahamane Tchiani chuan an ram rorelnaah eng ram mah inrawlh lo turin a vau a, ram hruaitute'n muangchanga an ram dinhmun an tichhe zel chu siam ṭha tura lo che chhuak a nih thu a sawi bawk. An sorkar siam thar laka ram dangte'n hrekna an siamte chu an pawm loh thu leh, ram dangin an vauna hmanrua nia a ngaih thu a sawi. Tchiani hian ram dangte thiltih dan chu Niger tihhmingchhiat tumna leh kaihhruai theih loh anga lantir an tumna a ni, tiin a sawi. Niger ram mipuite chu an ram venghim tlat turin a chah bawk.