India nena inbiakna nei turin kan inpeih : Pakistan PM

Pakistan prime minister Shahbaz Sharif chuan India nena indo chu thil ṭha a nih dawn loh avangin inbiakna neihpui tura a inpeih thu Islamabad-a conference a neihnaah a sawi.

PM Sharif chuan Pakistan chu nuclear nei ram ni mah se, indona atan ni lo a, invenna tur chauha nulcear nei a nih thu a sawi a,"Pathianin zah ngai se, nulcear indona chuan mihring a tichimit mai dawn a, indo chu thil tihchi a ni lo a ni," a ti.

Sharif chuan ram pahnihte chu kum 75 liam ta chhungin vawi thum an indo tawh thu a sawi a, heng indonnaah hian mipui hamṭhatna leh ram hmasawnna atana hman theih tur sum leh thil tam tak Pakistan-in a hloh tih a sawi. "Sawihona mumal tak leh inlungrualna tel lo chuan kan harsatna neihte inhre thiam tawn taka sawi fel a theih dawn loh a ni," a ti bawk

August 5, 2019-a Jammu & Kashmir chanvo humhimna, Article 370 hlih a nih aṭang khan India leh Pakistan inkar khi hi a nasa zual a, India chuan Pakistan-in ramri kana firfiakna an thlen ṭhin an tihtawp hma chu inbiakna neih an duh loh thu a la sawi thung.

India external affairs minister S. Jaishankar chuan,"Pakistan hian ramri kana firfiaka chetna an thlawp chhung chuan India hian inbiakna neih hi a kalpui thei lo. Pakistan nena inremna leh inṭhianṭhatna mumal tak neih hi he harsatna sukiang lo chuan a theih dawn loh a ni," tiin a sawi ve thung. "Ram ṭhenawm kan sawi dawn chuan Pakistan hi sawi tel a rem rih lo. Firfiaka chetna kan do tlang a nih loh chuan inremna a awm thei dawn lo tih hi thil nihna dik tak a ni," a ti.