Indonesia-in Turkey aṭangin drone 12 lei dawn

Indonesia sorkar chuan an ram defence system thuam chakna turin, Turkey Aerospace hnen aṭangin drone 12, USD mtd 200 man hu a lei dawn.

Defence Ministry chuan hemi chungchangah hian thuchhuah siamin, Turkish Aerospace nen hian Indonesia military defence equipment tihchangtlunna turin kumin February 3 khan contract hi an lo ziak tawh a ni, a ti. Drone 12 an lei, ANKA drone-te hi kum 2025 November thlaah an dawn hman beisei a ni.

Kumin January thla khan Indonesia hian Qatar air force-te hman ṭhin, French company Dassault Aviation siam advanced Mirage 2000-5 fighter jet 12 lei, USD mtd 805 man leina turin inremna an lo ziak tawh bawk. Hei bakah defence minister Prabowo Subianto chuan kum 2022 khan Dassault Rafale fighter aircraft unit 42 lei a lo remti tawh bawk a, twin-engine Rafale fighter pathum chu kum 2026 January thlaah Indonesia kuta hlan hman tum a ni.