Russia eptu hruaitu Navalny kum 20 tan belh mai thei

Russia eptu hruaitu, kum kua tang tura hrem mek, Alexei Navalny chu nimin khan a thubuai dang, sorkar laka hela puhna chu ngaihtuah niin, he thubuaiah hian thiam loh chantir a nih chuan kum 20 chuang jail a tan belh thei dawn a ni.

Court hian Navalny thubuai hi Navalny tan mekna; IK-6 penal colony, Moskow aṭanga km 250 chuanga hlaa maximum security prison chhungah a ngaihtuah.

Navalny hian court chuan hremna na thei ang ber hmanga an hrem ngei a duh thu a sawi a,"Mi 100 in hrem leh tan ina in khung hian Putin hian mi nuai chuang a tithinrim thung a ni," tiin a sawi. Prosecutor-te chuan Navalny hian pawl a din a, an pawl hian venhimna hna thawkte chu ngainepin, firfiak ang lek lekin an che niin an sawi.

Navalny hian social media-ah zuitu a ngah hle a, Russia mi pawimawh tak takte eiruknate tarlangin, sorkar do zawnga che tura fuihna lamte a post ṭhin. Russia official-te zinga induhsakna leh inthamna awm ṭhin chhui tura a din, Anti-Corruption Foundation chu tharum thawh zawnga che ṭhina puhin, kum 2021 khan sorkar chuan a khap tawh bawk.

Navalny hi tura hrai a nih avangin Germany-ah hun rei tak a inenkawl a, kum 2021-a Moscow-a a haw chu man niin, tan inah dah zui nghal a ni. Navalny chuan tura hrai a ni chu Russai sorkar thiltihah a puh a ni.